Unha nova aplicación engade posibilidades ás webcams de Logitech

As webcams de Logitech gozan de grande sona en equipos informáticos, especialmente entre usuarios que realizan retransmisións en directo a través da Rede, e que seguro que agradecerán a renovación do seu software, polo momento en beta pública. Deste xeito, os usuarios dunha cámara Logitech C920, C922 ou BRIO 4K Pro poden descargar xa a aplicación Logitech Capture, que busca atender ás novas necesidades do público, que xa non limita o uso de cámaras no ordenador a videoconferencias.
Logitech Capture permite gravar contidos de múltiples fontes, é capaz de gravar vídeo vertical en formato 9:16 (por se queremos producir no ordenador vídeo de calidade que logo consumir dende dispositivos móbiles), permite funcionar como cámara virtual para que os resultados da aplicación poidan aplicarse ás emisións que realicemos en directos de plataformas como YouTube, incorpora controis profesionais durante as gravacións (aplicar chromakey, efectos de transición, engadir bordes...) e tamén permite personalizar a configuración da cámara (modificar a resolución, os fotogramas por segundo, o enfoque, o balance de brancos...).
Temos así unha ferramenta que claramente engade valor ás webcams de Logitech, e que alongarán a súa vida ao convertelas en dispositivos válidos para moitos máis escenarios dos que o seu fabricante tiña pensado inicialmente.