Unha televisión xaponesa anuncia o abandono do HD DVD por parte de Toshiba

A guerra de formatos de disco óptico de alta definición chega á súa fin, e despois de que a Warner abandonase o HD DVD en favor do Blu-ray, outras compañías seguiron os seus pasos (incluíndo o principal distribuidor de películas pornográficas en alta definición), polo que os consumidores abandonaron masivamente o formato apoiado por Toshiba, de aí que só era cuestión de tempo que o fabricante tirase a toalla, o que anunciou este sábado a televisión nipona NHK, que asegurou que as fábricas de Toshiba deixarán de producir HD DVD, de xeito que nos vindeiros meses procurarían desfacerse do stock duns reprodutores que dificilmente colocarán no mercado ante a súa data de caducidade.

A mesma televisión estima que a primeiros desta semana se celebrará unha xuntanza extraordinaria da xunta directiva de Toshiba para oficializar o cese da produción do HD DVD, que segundo moitos está a seguir os mesmos pasos que o Betamax, aínda que desta volta é Sony o fabricante que saíu vencedor da guerra de formatos.
Toshiba tería perdido uns 10.000 millóns de iens (63 millóns de euros) na produción de reprodutores e gravadores de HD DVD, o que non sería asumible trala perda do apoio dos grandes estudos cinematográficos e mesmo das tendas Wal-Mart e dos videoclubs Netflix.
Queda por ver cómo responderá a esta dramática nova Microsoft, posto que a consola Xbox 360 apostou polo HD DVD coma formato, aínda que, ó ser mediante unha unidade de lectura externa, non sería de estrañar que a compañía de Redmond lance en breve un reprodutor externo Blu-ray para a súa consola de nova xeración.
De tódolos xeitos, hai que non da a guerra da alta definición por rematada, xa que algúns pensan que o Blu-ray tamén fracasará, de xeito que as descargas a través da Internet ou o vídeo baixo demanda ofertado por operadoras de cable serán o futuro, aínda que os vellos hábitos (que levan ó coleccionismo de obxectos físicos) e as limitacións das infraestruturas actuais poderían deixar un oco para o Blu-ray.
ACTUALIZACIÓN: Toshiba nega que pechase a produción de HD DVD, pero outras fontes aseguran que o anuncio oficial podería chegar este martes ou mércores.