WhatsApp estrea aplicación de escritorio (para Windows e Mac)

Unha das principais eivas de WhatsApp, o feito de que só pode empregarse dende único dispositivo móbil no que se almacenan as comunicacións, está a demostrar ser tamén unha fortaleza (xa que as nosas mensaxes non quedan almacenadas nos servidores de WhatsApp, dificultando así que un terceiro poida acceder ás mesmas), pero ante a demanda dos usuarios de poder empregar esta ferramenta dende o ordenador en xaneiro de 2015 estrearon unha curiosa versión web de WhatsApp que realmente trátase dunha ponte á aplicación instalada no noso móbil, o que é unha solución bastante intelixente na que agora avanzan transformándoa nunha aplicación para Windows e OS X que xa podemos descargar de balde.
Deste xeito, agora temos unha aplicación de escritorio de WhatsApp, dende a que poder acceder ás mensaxes que teñamos no móbil dende o ordenador, o que facilita que cando esteamos na casa ou no traballo podamos contestar rapidamente ás mensaxes valéndonos do teclado do ordenador, así como tamén facilita o envío de documentos que teñamos almacenados no ordenador (lembremos que, aparte de vídeos e imaxes, actualmente WhatsApp tamén permite o envío de documentos ofimáticos).
A nova aplicación, que mantén en esencia as funcionalidades de WhatsApp Web (incluíndo o feito de ter que ligar a aplicación ao móbil a través dun código QR), é compatible con equipos que teñan como mínimo Windows 8 ou OS X 10.9, e ao executarse no ordenador permite recibir notificacións no escritorio e tamén permite empregar combinacións de teclas, entre outras cousas que fan atractivo o seu uso no escritorio informático.