Windows XP trasvístese de Windows 7

Para os usuarios máis ansiosos por facerse con Windows 7, pero que aínda non pasaran a Vista, os peruanos de Miwradsoft lanzaron Seven Remix XP, unha aplicación que cambia a aparencia de Windows XP dotándoa dunha estética moi semellante á de Windows 7, e que é compatible con Windows XP/2003/Media Center Edition e XP Tablet PC Edition en todas as súas versións internacionais (aínda que incompatible coas versións de 64 bits).
A instalación desta aplicación non precisa de coñecementos avanzados (coma outros métodos de modificación da aparencia do sistema operativo) e permite configurar o nivel de semellanza a Windows 7 que se pretende lograr, imitando a pantalla de carga, o menú de entrada de usuarios, os protectores de pantalla, o tema do sistema e moitos outros detalles.