Wordpress para Android permite amosar as estatísticas do noso blog nun widget

Para facilitar a publicación e administración de blogs baseados en WordPress dende dispositivos móbiles existen aplicacións oficiais bastante prácticas, que en cada revisión achegan novas prestacións atendendo ás demandas dos seus usuarios, e esta ferramenta que facilita o control de bitácoras de Internet baixo WordPress.com ou o CMS de WordPress.org chega en Android á súa versión 4.7, que destaca por dúas novas funcionalidades: un novo widget e maior control das notificacións.
O widget que estrea WordPress 4.7 para Android é o de estatísticas, de xeito que o usuario pode colocar no menú do seu smartphone unha caixa que recolle as estatísticas do día do seu blog, na que figuran o número de visualizacións, visitantes, gústames e comentarios, de xeito que non é preciso abrir a aplicación para coñecer esta información actualizada a cada hora.
No que respecta ás notificacións, a aplicación ten un novo xeito de filtralas, axilizando a súa localización, xa que agora poderán filtrarse por comentarios, seguimentos, gústames e notificacións pendentes de ler, continuando a ser posible a consulta de todos os tipos de notificación á vez.
Dende o equipo que desenvolve a aplicación lembran que este tipo de novidades chegan normalmente de xeito anticipado aos seus beta testers, polo que recomendan aos máis ansiosos e curiosos a inscribirse na súa Comunidade de Google+ para poder acceder ás versións de proba.