A USC celebrará un curso de software libre este verán

A Revolución do Software Libre (OS REVOLUTION 09) é o nome que os responsables da Oficina de Software Libre da USC lle quixeron poñer ao vindeiro curso de formación sobre aplicacións abertas que a entidade académica vai levar a cabo no vindeiro mes de xullo.
A iniciativa, que consistirá na celebración dunha serie de relatorios sobre as ferramentas que están a revolucionar a industria da informática e a relación que millóns de usuarios en todo o mundo teñen coas tecnoloxías asociadas a esta (daí o nome das xornadas), enmárcase nos Cursos de Verán que a USC oferta para a vindeira tempada e ten como principal obxectivo expoñerlle aos asistentes a historia do cambio que está a sufrir o modelo económico da industria da informática neste momento.
As conferencias, que serán impartidas por recoñecidos referentes profesionais e filosóficos das múltiples áreas implicadas, serán exposicións teóricas que abranguirán todo o referente ao software libre como modelo do que tomar ideas para renovarse e estarán avaladas polos datos e a experiencia que as entidades que representan (administracións, empresas, universidades, asociacións…) poden aportar.
O curso está pensado para un público xeralista, en boa medida ca vontade de amosar o xeito en que o Software Libre afecta a toda a sociedade. Partirase das nocións básicas e non son precisos coñecementos previos de ningún tipo. Nembargantes, agárdase que o curso sexa tamén de interese para os veteranos no mundo do Software Libre, xa que permitirá abordar moitos aspectos que decote quedan en segundo plano.
A actividade desenvolverase do 20 ao 24 de xullo na aula 10 da Facultade de Xeografía e Historia e terá un aforo limitado de 150 alumnos, que terán de prazo ata o vindeiro 10 de xullo para matricularse.