A USC crea un software que prevé os riscos de aboar con zurro

A Escola Técnica Superior de Enxeñaría da Universidade de Santiago de Compostela vén de desenvolver unha ferramenta informática que permite detectar unha acumulación elevada de metais pesados nos residuos empregados nos prados, vulgarmente falando, os contaminantes no xurro.
O risco ambiental deste líquido que solta o esterco e que se emprega a miúdo como abono agrícola, xa pode medirse mediante un software informático desenvolvido baixo a coordinación do catedrático Enrique Roca Bordello da ETSE de Santiago.
O obxectivo deste equipo de investigadores da USC era establecer mecanismos no deseño dos plans de aboado (como criterio complementario aos requerimentos de nutrintes) e, no caso de detectar unha acumulación de contaminantes elevada, recomendar a sustitución do abono que se está a empregar para evitar posibles riscos.
O paso final do proxecto (financiado polo Plan Galego de I+D+i) foi o desenvolvemento do devandito software, para o cal, os investigadores crearon unha serie de escenarios onde estudaron a posibilidade de empregar zurro como abono nos prados nos que pasta gando vacuno.
Os científicos traballaron con datos procedentes dunha cooperativa da provincia de Lugo e centráronse no risco derivado da presenza de metais pesados no abono natural.
Segundo indicou o profesor Roca, estes metais poden trasmitirse e acumularse no chan e, en consecuencia, “trasferirse ao gando a través do pasto, e ao home por medio da cadea alimentaria”.
Para prever que isto suceda, os propios imperativos legais esixen estimar os posibles perigos ambientais que poden derivarse das actividades agrogandeiras e deseñar medidas que os eviten; uns requisitos que o software galego axuda a cumprir de xeito doado.

Os investigadores da ETSE contaron para este proxecto (ademais de coas vacas lucenses, que fixeron o propio para proporcionar zurro dabondo) coa colaboración do Centro de Supercomputación de Galicia, do CIS-Ferrol e de varios grupos da USC.