A Xunta impulsará o software libre potenciando a súa implantación en empresas e Universidades

A secretaria xeral de Modernización e Innovación Tecnolóxica, Mar Pereira, sabedora de que as aplicacións en código aberto “teñen un interesante potencial para crear modelos de nogocio e dinamizar o sector TIC local de xeito eficaz e económico”, vén de facer pública a súa intención de impulsar a implantación do software libre en toda a nosa comunidade, e en especial, en áreas como as pequenas e medianas empresas, as Universidades e os centros de investigación, para, dese xeito, potenciar a súa aplicación aos sectores produtivos e estratéxicos de Galicia.
Pereira, que hoxe mesmo presidiu unha xuntanza con representantes das Universidades galegas, o CESGA e os axentes que colaboran coa Administración para establecer novas liñas de actuación a prol do desenvolvemento do software libre en Galicia, avogou por manter un contacto directo e continuo con todos os axentes implicados (empresariado, institución, comunidades de desenvolvemento de software libre...) e calificou esta colaboración como “clave, para orientar axeitadamente as políticas tecnolóxicas e facer ao software libre partícipe das mesmas”.
A secretaria indicoulle aos asistentes que, “o que demanda a sociedade, o empresariado e o empregado público son solucións que lle fagan a vida e o traballo máis doado e, no caso das empresas, que incremente a súa competitividade”, unha demanda social que a Secretaría que representa Pereira xa está a atender, a través de iniciativas e solucións baseadas tanto en software libre como en software propietario, dous estándares distintos que segundo Pereira, “deben convivir, para garantir a interconxeión entre diferentes solucións tecnolóxicas e dar resposta á demanda cidadá”.
Pereira sinalou que, desde a posta en marcha da iniciativa galega polo software libre, son moitas as actividades levadas a cabo por parte da Xunta e das diferentes institucións e comunidades de usuarios coas que colabora estreitamente; neste senso, a conselleira destacou o a importancia de poder escoller o galego como língua principal coa que usar os nosos equipos, porén recoñeceu que “o software debe estenderse por convencemento e non por imposición”.
Co obxectivo de afondar no desenvolvemento e na investigación do software libre, a Secretaría Xeral de Modernización e Innovación Tecnolóxica vai crear, segundo afirmou a súa máxima mandataria, un Centro Demostrador de produtos de software libre que permita dar a coñecer os casos de éxito en sectores concretos, así como un Servizo Integral ás pequenas e medianas empresas galegas, dende o cal traballar coas mesmas e coñecer as súas impresións no uso de modelos de software libre para aportar solucións axeitadas ás súas características.
Todo isto, indicou, apoiado nun Estudo comparativo sobre software libre de xestión empresarial para a mellora competitiva da industria galega, “que identifique ámbitos de actuación”.
Asemade, a conselleria fixo fincapé na necesidade de fomentar o Repositorio de software Libre en Galicia como ferramenta estratéxica para o seu desenvolvemento, e o impulso á implantación efectiva dos estándares abertos.
Deste xeito, segundo explicou Mar Pereira, a Xunta porá en marcha o procedemento para licenciar como software de fontes abertas o software desenvolvido con fondos públicos, e que sexa propiedade da Administración autonómica, “de xeito que estea a disposición daqueles organismos e administracións que amosen interese nel”. Así mesmo, empregará documentos baseados en estándares abertos como a política de Goberno nas súas comunicacións coa cidadanía.

Formación e divulgación

Nesta área, conforme relatou Pereira, a Xunta establecerá un plan de acción a medio e longo prazo coas institucións interesadas no desenvolvemento do software libre: universidades, grupos e comunidades de usuarios, centros tecnolóxicos, CESGA... e tamén, colaborará con outros organismos para coordinar accións formativas na sociedade e nas empresas.
A Rede de telecentros, pola súa banda, servirá para achegar o software libre aos cidadáns e, no que respecta ás empresas, realizarase a través de programas formativos orientados a institucións, clústers, plataformas ou asociacións, etc; e orientado ao sector TIC, o que se fornecerá a través dun plan efectivo de excelencia empresarial.
Tamén se actuará no ámbito educativo, colaborando coa Consellería Educación e Ordenación Universitaria para a formación de profesorados de primaria e secundaria, para elaborar contidos dixitais orientados ao tele ensino e para fomentar iniciativas de tradución ao galego das ferramentas de software libre e promover o mantemento destas traducións nas sucesivas versións dos produtos, contando co apoio de Política Lingüística.