A comunidade de usuarios de programas abertos celebrou o Día da Liberdade do Software

O pasado sábado, tal e como nos relembraron un ano máis os compañeiros da Comunidade O Zulo, dende Mugardos (sede do encontro Kernel), celebrouse o Día da Liberdade do Software, tamén coñecido polas súas siglas en inglés, SFD. A cita foi, coma sempre, unha celebración mundial das vantaxes da programación aberta, facendo fincapé na necesidade de conseguir que estas vantaxes non sexan só coñecemento duns poucos, senón de toda a comunidade de usuarios das novas tecnoloxías. A celebración, que se vén desenvolvendo dende 2004, tamén se centra en informar das potencialidades da programación libre entre as empresas e as administracións, sobre todo polo que teñen de aforro e adaptabilidade, cuestións especialmente importantes nuns tempos, os que vivimos, moi críticos dende o punto de vista orzamentario.
Segundo se sinala na web de Mancomún, estamos ante un “día especial para insistir e concienciar á cidadanía de que o software libre é unha tecnoloxía madura e de calidade capaz de ofrecer solucións en calquera ámbito”. Resumindo, do que se trata é de desvelar as posibles dúbidas que haxa arredor do código aberto e da súa viabilidade, cousa que xa está máis que probada e certificada, tanto por parte de institucións estatais como por exemplo CENATIC (que fixo fincapé no importante medre que está a experimentar este tipo de programación entre as empresas españolas) como por parte de institucións galegas, é o caso do observatorio OSIMGA, que desvelou a semana pasada positivos índices de crecemento deste software no noso tecido privado.
De despexar dúbidas, se é que aínda quedan, tamén tratou o encontro convocado polo Zulo en Mugardos, unha nova edición do seu día Kernel que contou coa participación dos principais representantes da nosa comunidade usuarios e desenvolvedores de software libre.
Segundo informa Mancomún, esta xornada de celebración, a nivel internacional, é coordinada pola organización sen arela de lucro Software Freedom International quen subministra soporte e un punto de colaboración, mais son os grupos e organizacións de voluntarios locais arredor de todo o mundo quen organizan diversos actos para motivar ás súas respectivas comunidades.

O evento de Mugardos

Volvendo a Mugardos e cita desta pasada fin de semana, dicir que o Kernel é un evento lúdico-tecnolóxico que se celebra na vila da comarca ferrolá dende o ano 2004. Organizado conxuntamente pola Asociación Comunidade O Zulo e o Concello de Mugardos, asisten dende rapaces de 15 anos ata universitarios, electricistas, tubeiros, informáticos, etc. Segundo apunta a organización, trátase dun encontro especialmente axeitado para persoas directamente relacionadas coa tecnoloxía, os xogos e a Rede na súa vertente máis aberta. “Sentimos paixón polo software e a cultura libre”, sinalan os organizadores, “así que se queres aprender ou ensinar swlibre, no Kernel 2011 terás oportunidade de coñecer a moita xente con intereses comúns”.