A comunidade galega de tradución de software libre reúnese este sábado da man de Trasno

Membros de Trasno nunha reportaxe recente do programa Ben Falado!

O colectivo Trasno, centrado na promoción do software libre na nosa terra, facendo fincapé na súa achega en galego, organiza este sábado 28 de maio a súa seguinte xuntanza trasneira, un encontro que servirá para establecer as liñas a seguir pola dita plataforma de usuarios e deseñadores de programación aberta e, tamén, para fomentar a colaboración acerca dun asunto que nos implica a todas e todos: a adaptación á nosa lingua de novos programas informáticos libres. Tendo en conta isto, e tendo en conta a importancia do traballo colectivo en calquera asunto ligado ao código aberto, Trasno xa está a mobilizar ao devandito evento a toda a comunidade galega de tradutoras/es.
A cita será en Ourense, na Casa da Xuventude, e, tal e como avanzamos hai uns días nesta mesma web, dará comezo cunha asemblea xeral ordinaria para logo dar renda solta a un fondo e participativo debate sobre tradución ao galego de software libre. A Trasnada 11.0, de feito, será máis que nunca un obradoiro colectivo de traballo entre usuarios e deseñadores de software libre e localizadores á nosa lingua.
De feito, informa o colectivo Trasno, están convidadas/os a participar neste debate sobre presentes e vindeiros consensos de localización ao galego tódalas e tódolos tradutoras/es de programación aberta que desexen pór o seu gran de area no traballo conxunto. Esta rolda de intercambio de datos, libre para o público en xeral, dará comezo sobre as 12.00 e proseguirá ao longo do resto da xornada.
De xeito complementario á rolda de debate, engade Trasno, celebraranse actividades de promoción e formación en localización á nosa lingua de programas abertos. A primeira hora da tarde, ás 17:00, terá lugar un relatorio na que se conmemorarán os 11 anos de Proxecto Trasno, repasarase a súa historia e exporanse os logros en tradución feitos este último ano. Ás 18:00 terá lugar un curso rápido de formación en tradución de software libre, que permitirá aos asistentes adquirir nocións de abondo como para comezar a participar no proxecto. O evento clausurarase ás 19:30.
Con independencia da axenda da xornada, informa Trasno, “calquera pode achegarse en calquera intre ao evento e coñecernos de primeira man”.
A Trasnada forma parte das actividades que Trasno realiza co financiamento da Xunta de Galicia a través do Convenio de Colaboración das AGUSL coa Secretaría Xeral de Modernización e Innovación Tecnolóxica da Xunta de Galicia incluído dentro do Plan de Acción FLOSS 2011. Nos vindeiros días irase fornecendo aos internautas galegos de máis información sobre a xornada, deixándose a porta aberta para a inclusión dalgunha que outra sorpresa no programa de actividades.