A firma galega Tegnix ábrelle unha rede social ao seu espazo formativo

A empresa galega Tegnix vén de abrir o espazo formativo de seu á comunidade en liña. Máis en detalle, falamos da posta en marcha da Rede Social Profesional da Aula Tegnix, unha iniciativa que xunta formación con comunicación e interactividade 2.0 e na que xa podemos participar, segundo nos conta o compañeiro Roberto Brenlla, responsable deste espazo formativo, unicamente teremos que inscribírmonos e termos presente que a información que vaiamos compartir cumpra unha serie de requirimentos. Este coñecemento que xeremos deberá xirar arredor do software libre, ser sobre todo de carácter profesional e, tamén, vir supervisado previamente para confirmar que lle acae aos ditos obxectivos.
Polo demais, non hai restricións. Nin de idiomas nas publicacións nin de extensión. Con todo, si que é positivo, coméntanos Brenlla, ter en conta que a rede está enfocada a toda Iberoamérica, polo que, amais do inglés (considerado o estándar en informática), serán axeitados o galego (sobre todo pola nosa irmandade con Brasil e Portugal), o castelán e o portugués. Por outra banda, a intención é tirar partido da rede con fins didácticos, liña de actividade para que xa existen grupos en función das accións formativas da Aula Tegnix. En definitiva, que grazas a esta iniciativa, poderemos (entre outras cousas) enviar ou recomendar artigos, comentalos, subir fotos ou vídeos, coñecer de primeira man a profesionais con intereses compartidos, comunicarnos con eles, chatear, etc.
Lembrar que Tegnix, empresa especializada en formación e servizos informáticos relacionados co software libre, foi acreditada recentemente polo Centro Nacional de Referencia de Aplicación das TIC baseadas en fontes abertas (CENATIC) como fonte de coñecemento de primeira orde e referente a nivel estatal arredor do open source. Máis polo miúdo, a entidade dependente de Red.es (Ministerio de Industria) recoñeceu á empresa que dirixen Roberto Brenlla e Carlos Rodríguez como Centro Formativo no Ámbito do Software de Fontes Abertas. Esta acreditación, informaron no seu día, reforza a crecente oferta formativa da Aula Tegnix, altamente especializada en software libre e dirixida sobre todo ao eido profesional e empresarial.