A galega Siongal presenta a figura do comercial en Internet
luns, 21 de febreiro do 2011
Contar cun axente
comercial en Internet, tal e como se desprende dunha análise realizada pola
compañía tecnolóxica Siongal, “pode saír
moi rendible para unha empresa”.
Esta entidade galega,
especializada en desenvolver novas solucións de comercio electrónico, implantou
o seu modelo Siongal e-Business en
diversos sectores, e logo da experiencia resultante, conclúe que a posta en
marcha dun axente comercial en Internet “permítelle
a unha empresa lograr un aumento de vendas cun custe moi inferior, de até un 40
por cento menos”.
A figura do comercial en
Internet, segundo explica Eduardo Montero, director comercial de Siongal, “consiste nun axente comercial especializado
na venda a través da Rede, que se encarga de coñecer o modelo de negocio de
cada empresa, asesorar a esa empresa e realizar as accións de promoción online
que resulten máis eficaces para rendibilizar o seu investimento e incrementar o
ritmo de vendas”.
“As accións de promoción
que realiza o axente comercial”, engade, “diríxense especificamente ao perfil de
clientes que busca a empresa e céntranse naqueles medios en Internet onde se
atopen, como buscadores, redes sociais, foros, portais do sector...”
A proposta de Siongal, que entre os seus servizos de apoio e
asesoramento inclúe a figura do comercial en Internet, é asemade, “un modelo de crecemento moi flexible, xa que
o cliente pode controlar en todo momento o seu investimento e aumentalo a
medida que vaia obtendo resultados”, conclúe Montero.
A figura do comercial en Internet que propón
Siongal, está a aplicarse xa con éxito en diversos sectores produtivos e en
todos eles, segundo afirman, “está a
mostrarse especialmente eficaz á hora de romper barreiras xeográficas, xa que
se amplía a carteira de clientes e distribuidores en zonas nas que aínda non
tiña presenza”.