A galega Tegnix vén de ser acreditada por CENATIC como centro formativo de fontes abertas

A empresa galega Tegnix, especializada en formación e servizos informáticos relacionados co software libre, vén de ser acreditada polo Centro Nacional de Referencia de Aplicación das TIC baseadas en fontes abertas (CENATIC) como fonte de coñecemento de primeira orde e referente a nivel estatal arredor do open source. Máis polo miúdo, a entidade dependente de Red.es (Ministerio de Industria) recoñeceu á empresa que dirixen Roberto Brenlla e Carlos Rodríguez como Centro Formativo no Ámbito do Software de Fontes Abertas.
Esta acreditación, informan, reforza a crecente oferta formativa da Aula Tegnix, altamente especializada en software libre e dirixida sobre todo ao eido profesional e empresarial. Tegnix, que por certo vai presentar esta vertente divulgativa no programa Emprende de TVE que se emite o xoves 26 (incluíndo declaracións de Brenlla dando conta dos porqués e os obxectivos da devandita Aula), tamén atesoura neste intre outro importante aval á súa actividade, que é a certificación de LPI ATP (acrónimo de Linux Professional Institute Approved Training Partner) e as ISO-9001, ISO-27001 e ISO-20000, ao que cómpre engadir, en palabras dos responsables da firma galega, unHA extensa experiencia formativa profesional en programación aberta.