A rede WiMAX de Samos non cumpre coas expectativas dos veciños

Un grupo de veciños de Samos presentaron un escrito ante o seu Concello no que protestan ante o mal funcionamento da rede WiMAX de acceso á Rede instalada na vila, que prometía unha cobertura do 100% na capital municipal antes de rematar o ano e na actualidade non chega nin á metade da vila, no que consideran que é debido á mala ubicación das antenas que dan servizo.
Segundo parece, os afectados comentan que a empresa que xestiona este programa piloto desenvolvido pola anterior Consellaría de Medio Rural responde ás queixas asegurando que non poden queixarse por participar nun programa de balde.
De feito, a Xunta de Galicia decidiu rescindir o contrato coa empresa que ía facer o despregue da rede de banda larga no rural do sur de Lugo ante os malos resultados das probas pilotos de Samos e O Courel (que combinaban WiMAX e Wi-Fi), e na actualidade están a traballar nun novo plan que debería presentarse antes de rematar o ano.