A versión web de Skype incorpora chamadas de voz e vídeo en grupo

Unha das grandes diferenzas que había entre Hangouts e Skype era que o servizo de Google ofrecía conversas en grupo de balde, pero hai pouco máis dun ano Microsoft decidiu mudar a situación, facendo que as videoconferencias en grupo a través de Skype pasasen tamén a ser de balde, facilitando a realización de xuntanzas a distancia, o que agora pasa a ser aínda máis doado, xa que a versión web de Skype (actualmente en probas) e Skype en Outlook.com (que facilita o uso de Skype a través do webmail de Microsoft mediante un plugin) veñen de estrear a posibilidade de facer chamadas en grupo de voz e vídeo, de xeito que poderemos engadir ata 25 persoas a unha comunicación de voz e ata 10 persoas a unha videoconferencia, de xeito que poderanse organizar reunións familiares, xuntanzas de empresa ou incluso clases a distancia directamente dende o navegador web.
Estas novas prestacións aínda son bastante novas, polo que contan con algunhas carencias, pero espérase que se vaian superando nas sucesivas actualizacións do servizo.