AGASOL promoverá ferramentas das súas empresas no ámbito da Confederación de Empresarios da Coruña

AGASOL rematou o ano xuntando forzas con diversas entidades no seu camiño de acadar a máxima presenza das empresas de software libre galegas en múltiples ámbitos do noso tecido produtivo. Así, logo da alianza formalizada co Clúster TIC Galicia, a Asociación Galega de Empresas de Software Libre formalizou un pacto de colaboración co coa Confederación de Empresarios da Coruña, sendo o seu obxectivo promover e divulgar de forma conxunta o uso da programación aberta. Na sinatura do convenio participaron os presidentes de ambas as dúas entidades, Antonio Fontenla Ramil e Xavier Castaño García, respectivamente. O acto celebrouse o pasado 23 de decembro. O convenio, de duración indefinida, prevé a difusión dos servizos e as ferramentas abertas no ámbito empresarial provincial.
Segundo fixo saber o presidente de AGASOL, tanto a alianza co Clúster como coa CEC responden en boa medida ás propias demandas das nosas empresas, “porque buscan ante todo un modelo de negocio eficiente, adaptable ás súas necesidades, rendible e de alta calidade, e iso no ámbito do software ofréceo o software libre”. Xavier Castaño Garcia, presidente de AGASOL, engadiu que o convenio co Confederación é un paso adiante para a asociación, “xa que abre as portas ao afianzamento do peso específico que o software libre ten no sector empresarial galego. Asemade, apuntou, “abre unha canle de estreita colaboración co resto do sector empresarial que esperamos axude a crecer a implantación e desenvolvemento de software libre en Galicia”.