AGNIX celebra esta fin de semana o seu hacking-cocido 2011
mércores, 2 de febreiro do 2011
A asociación galega AGNIX, centrada na promoción
do software libre en tódalas súa facetas, celebra esta fin de semana un encontro
que ten moito de reivindicación dunha irmandade galega arredor da programación
aberta e, tamén, de recoñecemento do eido gastronómico e festivo que nos é
propio. En definitiva, que do que se trata é de fundir a nosa clásica forma de
xuntármonos coas cousas dixitais, que non teñen porqué ser incompatibles. Este “espírito
festeiro” é o que vai presidir o hacking-cocido
2011 que se celebra o sábado 5 en Casa
Amancio, sede de certas actividades e xuntanzas previas de AGNIX.
A nova convocatoria, informa a asociación na súa
web, é a constatación de que mesmo as xuntanzas tecnolóxico-dixitais obteñen os
mellores resultados se hai argumentos gastronómicos de peso de por medio. E no
medio de todo, comentan, mesmo se crea o ambiente axeitado para conversas de
alto nivel sobre o software libre e o seu papel dinamizador da Sociedade do
Coñecemento. E engaden: “Malia distancia
que aínda hai ata unha universalización do uso de solucións libres e a
distribución do coñecemento, cada dia estamos máis seguros de que este é o roteiro
que nos depara o futuro; así o comprobamos a cotío; só queda insistir con teima
e agardar o tempo pasar”.
