Afundación ultima a súa exposición sobre a intelixencia artificial

A sede Afundación Obra Social de Abanca na Coruña está a acoller xa a montaxe da exposición AI: More than human, proxecto expositivo interactivo sobre a intelixencia artificial creado polo Barbican Centre de Londres e coproducido polo Forum Groningen de Países Baixos, que poderá visitarse na cidade herculina a partir do vindeiro 5 de setembro.
Actualmente hai máis de 20 persoas traballando na montaxe que ocupará todo o edificio e que está comisariada por Alba Meijide, quen durante a presentación da exposición salientou que calquera tipo de público pode gozar da mesma, sendo apta para persoas que non teñan coñecementos de intelixencia artificial, así como para perfís máis tecnolóxicos.
A mostra realizará un percorrido completo a través da historia da intelixencia artificial, amosando as súas orixes e interesantes experimentos informáticos de figuras históricas como Ada Lovelace e Charles Babbage, así como importantes avances do século XX.