Apple triplica a cota de mercado de Android nos EE.UU.

Pese a que o NPD Group aseguraba que nos EE.UU. os móbiles con Android superaban en vendas aos iPhone, Nielsen vén de publicar uns datos totalmente diferentes (ou, canda menos, matizados), que parten do feito de que o 23% dos usuarios norteamericanos de móbiles xa teñen un smartphone no primeiro trimestre de 2010 (o que supón un importantísimo aumento con respecto ao 16% que rexistraban no segundo trimestre de 2009) e o iPhone conservaría o seu segundo posto neste mercado co 28% dos teléfonos avanzados (por detrás do 35% que consegue RIM coas súas BlackBerry), mentres que Android ten que conformarse cun 9% de cota (sorprendentemente por debaixo de Windows Mobile).
Pero hai que advertir de que estamos a falar de cotas de mercado, non de vendas na actualidade, de aí que Android aínda non teña moita presenza (esta plataforma leva no mercado pouco máis de ano e medio) pero si está a asentarse con firmeza, coma demostra o feito de que o 70% dos usuarios de Android teñan pensado adquirir outro móbil con Android no futuro, o que está moi preto do 80% de fidelidade que proclaman os usuarios de iPhone OS, mentres que BlackBerry só ten un 47% de usuarios que manterán a súa aposta por RIM e Windows Mobile que só retería ao 34% dos usuarios.