Ártabro Tech abre este xoves en Ferrol o ciclo Café con Ciencia
mércores, 6 de febreiro do 2019
- Fachada do edificio do Casino de Ferrol, sede da actividade
O
responsábel de Machine Learning na firma innovadora galega
Ártabro Tech, Miguel
Vidal Maroño, será o primeiro conferenciante do ciclo Café con
Ciencia que promoven a Universidade da Coruña e a devandita
empresa. A cita, aberta ao público, será este 7 de febreiro, a
partires das 19:30 horas, na sala de conversas do Casino Ferrolán, a
senlleira sala de conversas do Casino, con frescos do pintor Bello
Piñeiro e por primeira vez aberta ao público en xeral.
O
obxectivo do ciclo Café con Ciencia é “reivindicar a universidade
española, na que se formaron todos as relatoras e relatores deste
programa, moitos traballando agora en equipos de investigación ou
departamentos de innovación de empresas no estranxeiro”.
Polo
que respecta ao primeiro relator do programa, Miguel Vidal Maroño,
responsábel de Aprendizaxe Máquina (Machine Learning) na
nova firma innovadora Ártabro Tech, é doutor en Física de
Partículas pola Universidade Complutense de Madrid e licenciado en
Física pola USC. Desenvolveu o seu traballo doutoral no Fermilab, en
Chicago, onde está o segundo acelerador de partículas máis potente
do mundo, e despois pasou ao primeiro, no CERN (Xenebra), para
integrarse no equipo de investigación do Bosón de Higgs. Formou
parte, por tanto, do equipo científico que descubriu a chamada
“partícula de Deus” e que mereceu o premio Nobel de Física no
ano 2013.
No
outubro pasado Miguel Vidal regresou á súa cidade natal, Ferrol,
para integrarse na empresa Ártabro Tech e aplicar os seus
coñecementos no desenvolvemento de solucións de Intelixencia
Artificial.
Media
ducia de conferencias
Seis
conferencias, unha cada dous meses, comporán o ciclo Café con
Ciencia. Os relatores serán profesionais destacados do eido
científico e tecnolóxico e as súas intervencións terán un ton
divulgativo. Segundo explicaron os días pasados os organizadores do
programa, “a finalidade última será explicar o impacto positivo
que a investigación básica ou aplicada, en cada un dos seus ámbitos
de traballo, ten na vida cotiá e no avance, en xeral, da sociedade”.
Ademais
de Miguel Vidal, o acto de hoxe serviu para adiantar os dous
seguintes relatores. No mes de abril participará Covadonga Astorga
Lloréns, doutora en Química pola Universidade de Oviedo e, desde o
2002, investigadora da Dirección de Enerxía, Transporte e Clima do
Centro Común de Investigación da Comisión Europea. En xuño, o
relator será Carlos de la Cruz García, doutor en Química Analítica
e Nutrición e licenciado en Farmacia pola USC.