Chega a Bonxe o programa de formación en software libre impartido por MeLiSA

O Centro Penitenciario de Bonxe (Lugo) vai dar acollida hoxe ao comezo do cuarto dos obradoiros da iniciativa Tecnoloxía e Software Libre nos Centros Penitenciarios Galegos, unha achega itinerante de actividades impulsadas e organizadas por AMTEGA e desenvolvidas polos membros da Asociación de Usuarios de Software Libre da Terra de Melide (MeLiSA). Lembrar que o proxecto, inserido no Programa de Voluntariado Dixital da Xunta, ten “como obxectivo levar as novas tecnoloxías da información e o software libre a setenta reclusos dos centros penitenciarios emprazados en Galicia”.
Informar que o programa deu os seus primeiros pasos no mes de xullo no Centro Penitenciario de Monterrroso, e no mes de outubro deu o chimpo ao Centro de Inserción Social (CIS) Carmen Avendaño de Vigo e máis ao Centro de Inserción Social de A Coruña Carmela Arias y Díaz de Rábago. Arestora, desenvolve as súas achegas formativas no centro de Lugo-Bonxe, no que participan 14 presos. Segundo informan MeLiSA e AMTEGA, outro dos grandes obxectivos do programa é facilitar a inserción laboral dos internos con coñecementos informáticos de valor, “ofrecéndolles formación eminentemente práctica no ámbito das tecnoloxías da información e a comunicación TIC e do software libre”.
As sesións formativas deste obradoiro lévanse a cabo entre este luns 11 de novembro e o venres 15 de novembro na aula de informática do centro penitenciario, e estará a cargo dun voluntario da Asociación Usuarios de Software Libre MeLiSA, que compartirá o seu coñecemento cos internos.
Lembrar tamén que ao longo deste mes impartiranse os dous últimos obradoiros previstos nos centros de Teixeiro e Pereiro de Aguiar.