Deporte e TIC xuntan forzas en Santiago para levar os nosos clubs ao máis alto
xoves, 21 de marzo do 2019
Máis
de 200 persoas asistiron hoxe en Santiago, no hotel Palacio do Carme,
á xornada
Tecnoloxía
e Deporte promovida pola Fundación Deporte Galego da Xunta
de Galicia e organizada polas empresas da nosa terra R e Cinfo, co
obxectivo de afondar na capacidade de transformación das novas
ferramentas dixitais para todo tipo de vertentes deportivas: tanto
para quen o practica, como para quen o promove, como para quen o
desfruta dende as bancadas ou os fogares. A xuntanza, segundo lembrou
a organización “a primeira destas características que se celebra
en Galicia”, serviu entre outras cousas para emitir con altofalante
as potencialidades da
tecnoloxía Tiivii, un
sistema intelixente desenvolvido por Cinfo e distribuído por R que
ten a capacidade de extraer o máximo o desfrute de calquera
encontro, impulsar a actividade das federacións e clubs, dixitalizar
o deporte e facer que toda audiencia, por miúda e delimitada que
sexa, teña o que demanda.
Respecto
do programa, as accións deron
comezo ás 9.30 horas,
coa benvida aos participantes a cargo de Alfredo Ramos, director
xeral de R. A continuación foi
a quenda de Iván Clavel, xerente da Fundación Deporte Galego,
Antonio Rodríguez del Corral, director executivo (CEO) de Cinfo,
Gabriel Barros, responsábel de Marketing do Real Club Deportivo da
Coruña, e
Alberto Díaz, responsábel de Transformación Dixital de R.
Boa
parte das temáticas tratadas, no que a Cinfo e R se refiren, xiraron
arredor de Tiivii e as súas posibilidades para o espectáculo
deportivo. Segundo se lembrou, consiste nunha tecnoloxía de
televisión intelixente que é quen de seguir os xogadores ou
competidores e crear o directo de maneira automática, botando man de
tecnoloxías de Intelixencia Artificial. Cinfo e R, continuando este
fío, salientaron
as posibilidades que se abren coa dixitalización dos clubs que
propón Tiivii, poñendo en xogo novos servizos, maiores ingresos
(publicidade, merchandising, etc) e máis óptimas e
enriquecedoras experiencias para as comunidades de afeccionados. As
dúas empresas coincidiron en salientar a importancia de contribuír
a que os clubs de dixitalicen, no camiño de acadar a máxima
visibilidade e o recoñecemento que merecen.
Este
camiño transformador tamén obtivo destaque da man da CRTVG, que
estivo presente no encontro a través de José Pereira Fariña,
director de Innovación e Negocio da compañía galega, quen recordou
que para os medios como o que el representa, “é relativamente
doado moverse entre grandes audiencias para determinados
acontecementos concretos”, porén, o que xa non é tan fácil,
recoñeceu, “é moverse na información personalizada”, a
diferenza das novas canles, servizos e plataformas que operan no eido
dixital. “Non somos capaces de atender e cubrir eventos e temáticas
que interesan a audiencias pequenas, entre outras cousas porque o
despregue de recursos non obtén compensación”, dixo, ao tempo que
recoñeceu o potencial da tecnoloxía presentada no encontro
celebrado en Santiago para emendar esta eiva, xa que democratiza e
fai accesíbel a cobertura innovadora. “Colaboracións como a que
materializan Cinfo e R teñen moito que dicir no devandito”,
explicou, engadindo que van conseguir dar a todas as audiencias, por
específicas que sexan, o que requiren.
Relatorios
de apertura
Abriu
o evento ás 9.30 horas Alfredo Ramos, director xeral de R, quen puxo
o foco na importancia da xornada como “cita para crear novos
vieiros de colaboración e de progreso, para modernizar a contorna
deportiva e tirarlle todo o proveito á manchea de potencialidades
dos recursos tecnolóxicos de que dispoñemos a día de hoxe”.
De
seguido, Iván Clavel, xerente da Fundación Deporte Galego, incidiu
na importancia das prestacións da tecnoloxía no deporte “para o
aquí e agora que demanda o consumidor” e porque, en si mesma, “a
xestión do deporte necesita desa tecnoloxía que lle permita a
xestión eficiente e actual dos seus recursos”.
Pola
súa banda, Antonio Rodríguez del Corral, director executivo de
CINFO, dixo que a produción automática de contidos audiovisuais na
nube está “democratizando as retransmisións deportivas, antes só
ao alcance de grandes clubs”. Este tipo de emisións, engadiu, “son
o futuro, pois poñen á man de entidades e ligas, tamén de deporte
base (ou minoritarios), recursos técnicos con calidade profesional e
a baixo custo, permitíndolles chegar a grandes audiencias a través
da súa propia canle de TV automática, web ou redes sociais e
ofrecerlles aos afeccionados eventos audiovisuais á carta como
partidos, adestramentos ou roldas de prensa”.
Gabriel
Barros, voceiro do R.C. Deportivo da Coruña explicou que “a
aplicación da tecnoloxía será o motor do meirande chimpo económico
e social do deporte nestes anos ao converterse nun elemento máis da
industria do lecer e o entretemento”. Segundo dixo, “a
comunicación persoal, directa, á carta, cos seareiros, cambiará as
relacións con eles e a súa experiencia nos partidos e demais
eventos do club”.
Pola
súa parte, Gonzalo R. Palmeiro, adestrador axudante do Monbus
Obradoiro, falou do caso de éxito deste equipo no uso das novas
tecnoloxías aplicadas ao baloncesto profesional; e Alberto Díaz,
responsábel de Transformación Dixital de R detívose nas claves
para transformar dixitalmente un club deportivo. “Non facer nada xa
non é unha opción”, dixo, engadindo que R está a certificarse na
súa “aposta pola tecnoloxía no deporte, con servizos que van
axudar os clubs a dixitalizarse”.
Logo
das mesas redondas sobre (a primeira) dereitos audiovisuais do
deporte non maioritario e sobre (a segunda) sobre experiencias TIC
para xestionar as entidades deportivas e xerar ingresos, Leonor
Gallardo, doutora en Ciencias do Deporte, falou de liderado
deportivo, e subliñou que “a tecnoloxía, a investigación e a
innovación son o presente nas organizacións deportivas”. Puxo o
punto e final á xornada o secretario xeral para o Deporte, José
Ramón Lete, quen enxalzou a revolución tecnolóxica que estamos a
vivir como un instrumento para “premiar a quen fai máis méritos
no campo e para reducir os erros humanos dos árbitros”.