Dúas estudantes gañan o Open de galeguización de software libre da USC
martes, 16 de xuño do 2009
O premio Máis e Mellor, concedido pola Escola Técnica Superior de Enxeñaría
no marco do Open de galeguización de
aplicacións informáticas de software libre celebrado recentemente na capital galega, xa
ten vencedoras; trátase de Alejandra Mosquera Gómez, estudante de Enxeñaría
Técnica en Informática de Sistemas, e de Rocío Alonso Ramudo, estudante de
Historia da Arte na Universidade de Santiago de Compostela, que resultaron
elexidas pola comisión de normalización lingüística da devandita Escola.
A iniciativa, na que participaron un
total de dezasete grupos de formación moi diversa, tiña como obxectivo facer
que a interface e os menús principais do NetBean estiveran totalmente en
galego, algo que xa se pode dicir ben alto, pese a que, segundo veñen de
informar dende a entidade, “aínda queda
moito por facer”.
O caso é que, dos e das estudantes que
compartiron a devandita tarefa, “hai xa
nove persoas que van seguir colaborando nesa localización”, unha nova que
enche de satisfacción aos seareiros do software libre en xeral e aos
organizadores do devandito Open en particular.
