EGANET apoiará o labor da organización solidaria galega Implicad@s no Desenvolvemento
venres, 9 de marzo do 2012
- A ONG galega desenvolve o seu labor en diferentes países en vías de desenvolvemento, como por exemplo na India
Un
dos piares do noso sector, amais do coñecemento, a innovación e
valor humano, é a responsabilidade social. Así nolo recordou os
días pasados a Asociación de Empresas Galegas adicadas a Internet,
EGANET,
que vén de asinar un acordo de colaboración coa ONG galega
Implicad@s no Desenvolvemento,
organización centrada na loita contra as desigualdades entre os
países ricos e os pobres facendo especial fincapé noutra
desigualdade de base: a que sofren as mulleres do mundo, de
practicamente calquera país, con respecto dos homes. O acordo en
cuestión será un acordo TIC.
É
dicir, a través del, EGANET achegará a súa colaboración e
asesoramento tecnolóxico-dixital para fortalecer o labor de
Implicad@s e, así, mellorar na medida do posíbel a situación da
cidadanía en países en fase de desenvolvemento.
É
nestes países, precisamente, onde Implicad@s leva a cabo o seu
labor, agora reforzado grazas a EGANET para incrementar as
competencias en materia de emprego das novas tecnoloxías e
ferramentas das persoas que desenvolven o devandito labor. O convenio
foi asinado por Víctor López, presidente de EGANET, e María
Raimóndez, presidenta de Implicad@s no Desenvolvemento. Segundo
informa a asociación TIC, “ambas
entidades colaborarán para optimizar os proxectos tecnolóxicos
presentados pola ONG, idear e organizar novas accións que, a través
das novas ferramentas, incidan positivamente no eido da cooperación
e a igualdade de xénero, e divulgar entre as empresas socias os
diversos proxectos que manan da ONG, abrindo así a posibilidade de
implicación particular nos mesmos”.
No
curso do establecemento oficial da alianza, ámbalas entidades
fixeron fincapé nas cousas que teñen en común. Para EGANET, está
claro que as dúas entidades traballan dende o noso país, apostando
pola capacidade dos nosos profesionais e empresas e, tamén, polo
coñecemento e participación xerado dende aquí. As dúas coinciden,
tamén, no potencial da tecnoloxía ben empregada, precisa para
facilitar o día a día de quen traballa no seo das organizacións e,
sobre todo, da sociedade que se apoia nese traballo, “tanto aquí
como noutros países con menos oportunidades”.