España súmase á norma HbbTV 2 para ampliar as posibilidades da TDT interactiva

A Televisión Dixital Terrestre (TDT) chegou coa promesa da interacción, que finalmente non se concretou nunha realidade palpable, e practicamente o único que podemos ver nesta liña é o uso da tecnoloxía HbbTV por parte das televisións públicas, o que permite principalmente que nalgúns televisores conectados á Rede teñamos dispoñibles baixo demanda moitos dos contidos á carta que ofrecen Televisión España e a Televisión de Galicia con só premer un botón do mando a distancia (ou sexa, sen ter que contar cunha aplicación específica instalada).
Agora esta tecnoloxía está a mirar cara ao futuro, e a Asociación Español de Televisión Dixital Interactiva (AEDETI) e a Asociación HbbTV anuncian que o Foro Técnico da Televisión Dixital adoptou a nova norma HbbTV 2 versión 2.0.1 na súa especificación de receptores TDT para o mercado español. Deste xeito, os fabricantes de dispositivos que queiran superar a certificación TDT Híbrida deberán dispor da certificación HbbTV 2, o que facilitará novas funcionalidades como mellores gráficos, mellor accesibilidade, visualización simultánea sincronizada en distintas pantallas e distribución de contido en ultra alta definición con codificación HEVC.
José Luis Vázquez, presidente de AEDETI, asegura que «grazas a esta actualización da especificación, a TDT poderá incorporar novos formatos interactivos baseados no uso de segundas pantallas. A adopción de HbbTV 2 marca un importante avance para a televisión en España».
Esta tecnoloxía xa está a adoptarse en Gran Bretaña, Italia e países nórdicos, e resulta moi interesante de cara á integración de contidos interactivos, así como para que as televisións públicas poidan distribuír contidos en 4K a través de banda larga, de xeito que non sería preciso unha reorganización das canles de TDT para poder abrirse a contidos audiovisuais de maior calidade técnica.