Especialistas en coñecemento innovador avogan en Vigo por universalizar a estratexia da cooperación

A Factoría de Innovación de Vigo reuniu esta semana, novamente, un bo número de profesionais galegos relacionados coa propia temática da factoría: o coñecemento novo con capacidade de desenvolver o mundo que nos rodea. Do que se tratou, máis polo miúdo, foi de avaliar O ecosistema de innovación galego e os mecanismos de transferencia, este foi de feito o epígrafe da xornada. Nela, os relatores coincidiron en que as Administracións deben desenvolver novos mecanismos que aseguren que detrás dos proxectos de interese haxa diversas mans que se xunten para levalos a cabo.
Na cita estiveron, por exemplo, Bea Monfort e Nuria Bueno, representantes do departamentos de Proxectos de Tecnópole, que deron a coñecer as oportunidades que achegan complexos de negocios e desenvolvemento como o que elas representan, o Parque Tecnolóxico de Galicia en Ourense (San Cibrao das Viñas). Oportunidades, dixeron, que teñen que ver en boa medida con ofrecer un escenario axeitado para que as empresas dean forma aos seus traballos innovadores ao tempo que establecen ligazóns e alianzas con outras firmas da contorna, dando forma a novos traballos innovadores. Como exemplo do valor engadido que ofrecen estes recintos, expuxeron os resultados das iniciativas de Tecnópole 5 Sentidos para Innovar, da que falamos en Código Cero salientado a súa vocación de xuntadora de experiencias e capacidades, ou Galiciencia, a feira da nosa mocidade investigadora que este ano destacou non só pola cantidade de participantes e enxeños amosados, senón pola calidade dos mesmos.
Na xornada da Factoría de Innovación de Vigo tamén participou Lorenzo Pastrana, catedrático da área de Nutrición e Bromatología do Grupo de Investigacións Agroambientais e Alimentarias da Universidade de Vigo, que explicou que para que un ecosistema de innovación funcione de xeito eficaz é preciso “que exista biodiversidade e que os seus integrantes se interrelacionen entre si”. Ao seu parecer, o ecosistema galego de innovación está “ben consolidado”, en boa medida porque conta cunha importante rede de axentes que apostan polo desenvolvemento da I+D+i. Porén, tamén recoñeceu que é preciso mellorar o tecido investigador, sobre todo poñendo en xogo mecanismos de cooperación que permitan que funcione ao 100% das súas posibilidades.
Pola súa parte, Ricardo González, xerente do Clúster da Madeira de Galicia, explicou o papel dos clústeres no ecosistema de innovación, presentando algúns dos traballos realizados no sector da madeira. Máis polo miúdo, falou da implantación do Lean Manufacturing; do desenvolvemento do sistema Lingnum Facile para o intercambio de coñecemento entre o sector industrial e os principais prescriptores; e do recentemente aprobado Cloudwood, un traballo destinado á implantación de códigos QR no produto final e á posta en marcha dunha ferramenta de vixilancia competitiva que ofrece información específica aos socios do Clúster en función das súas necesidades.
Segundo informa a Factoría de Innovación de Vigo, a segunda parte da xornada centrouse na análise da eficacia da transferencia tecnolóxica e nas posibles melloras que se poden aplicar neste eido. Fernando Vázquez, responsable de Imatia Innovation, comentou que “o modelo de transferencia tecnolóxica tradicional só é válido para facer I+D+i por encargo”, polo que recomendou aos emprendedores que empreguen os resultados das investigacións que se están a realizar nas universidades para crear as súas propias empresas.
Pola súa banda, Roberto Graña, director xeral de Blubusiness, reflectiu diversos estudos actuais para lembrar que o 57% das empresas españolas nunca cooperaron cun centro de investigación ou tecnolóxico. Para corrixir isto, dixo, “habería que potenciar moito máis a cultura da cooperación e favorecer que dende as empresas se confíe máis nas universidades e vexan nelas un socio de I+D+i para realizar proxectos”.
Para rematar, África González-Fernández, directora do Centro de Investigacións Biomédicas da Universidade de Vigo, explicou a súa experiencia como investigadora para crear cun grupo promotor a empresa Nanoinmunotech, que ofrece os seus servizos a empresas e centros de investigación, e avaliou os atrancos aos que se enfrontan a diario desde a Universidade para que a transferencia tecnolóxica poida chegar a materializarse.