Este sábado arrinca a agardada nova edición dos CoruñaHacks
luns, 4 de marzo do 2019
Este
sábado 8 de marzo comezan de novo os CoruñaHacks,
as quedadas participativas sobre tecnoloxías abertas e construtivas.
Virán, ademais, cunha feitura semellante á da anterior edición con
tres hackatons a
desenvolver o 9 de marzo, o 13 de abril e o 11 de maio e todos co
obxectivo compartido de desenvolver proxectos open source en
equipo. A maiores, incorpórase un formato mini para a nova
xeración de argalleiras e argalleiros (a celebrarse de maneira
paralela e complementaria). Como lembraremos, Coruña Hacks vén da
man dos colectivos GPUL, Coruña Developers e Árticos.
As
entidades organizadoras recordan que durante a pasada edición foron
quen de xuntar unha media de 30 asistentes en cada un dos hackatons,
amais de media ducia de patrocinadores e un total de 13 entidades
colaboradoras, contando con asistentes de toda a xeografía galega.
“Do evento”, engaden, “saíron finalmente 4 proxectos, algún
deles moi interesante e cun grao moi avanzado de desenvolvemento como
é o caso de Aloha, por suposto todos eles software libre”.
Coruña
miniHacks
Este
ano, a maiores da versión tradicional, a organización decidiu
lanzar tamén en paralelo unha edición enfocada para os mais
pequenos da casa, os Coruña miniHacks, unha proposta para rapaces de
entre 8 e 16 anos que se desenvolverá os mesmos días que a versión
adulta, aínda que moitas menos horas por xornada. Segundo informan
os colectivos organizadores, nas sesións as participantes poderán
programar historias, aplicacións ou videoxogos, co único requisito
de poder levar un ordenador portátil.
A
maiores, haberá unha gala final con premios para os mellores
proxectos.
Apoiando
a iniciativa atópase novamente o Concello da Coruña, que deu o seu
respaldo a estes obradoiros dende as súas orixes (a través de
Coruña Dixital e da Área de Participación e Innovación
Democrática).
Segundo
lembran as entidades organizadoras, Coruña Hacks é unha proposta
aberta a todas as persoas que teñan a arela de experimentar coa
tecnoloxía, dando forma a novos programas e servizos de utilidade
común e afondando en detalles relacionados co hardware libre.
A
primeira xeira será no Centro Ágora e nela poderase debater sobre
que proxectos se traballará e constituír os equipos coas persoas
inscritas.