FreedomPop abandona o mercado español

xoves, 29 de novembro do 2018 Marcus Fernández

En xullo de 2016 o operador FreedomPop chegou a España ofrecendo telefonía móbil de balde, coa esperanza de captar centos de milleiros de clientes dos que boa parte poderían contratar os seus servizos Premium, pero a arriscada proposta non prosperou como desexaban, e o pasado mes de marzo anunciaron que eliminarían o seu plan de balde, de xeito que que agora para gozar do servizo era preciso pagar un mínimo de 2,99 euros/mes, cambio que non parece ter remediado a situación da compañía, que hoxe está a comunicar aos seus clientes que a partires do 29 de decembro interromperá os seus servizos en España.
Os clientes de FreedomPop poderán seguir gozando de telefonía móbil coa mesma tarxetas SIM se acceden pasar a ser clientes de Parlem Telecom, mantendo a mesma cobertura, pero cunhas tarifas diferentes, aínda que con prezos bastante axustados. Por exemplo, Parlem ofrecerá 150 minutos en chamadas e 3 GB de datos por 7 euros/mes, mentres que o resto de tarifas inclúen chamadas ilimitadas e o seu prezo mudará en función do volume de datos contratado, de xeito que para ter 2, 8, 19 e 26 GB habería que pagar 10, 14,99, 23 e 26,95 euros respectivamente.
Os usuarios actuais de FreedomPop que desexen manter a súa liña terán así que elixir entre as distintas tarifas que ofrece Parlem, operadora pertencente ao Grupo MásMóvil.

PUBLICIDADE