GALPon organiza o 25 de outubro unha mapping party en Vigo

O vindeiro sábado 25 de outubro terá lugar en Vigo unha festa aberta de mapeo colectivo, ou sexa, un encontro para seareiros do software libre e do inventariado xeográfico que se xuntan para cartografar un emprazamento en concreto coma se fose (e de feito é) unha comunidade de programación aberta: ou sexa colaborando en man común. A actividade en cuestión (unha mapping party do proxecto OpenStreetMap) vén da man de GALPon e conta coa colaboración de Xeoinquedos. Insírese no programa de accións dos Sábados Libres na Altamar.
Ao longo desta xeira de traballo colectivo fixada para o día 25 está previsto que os participantes percorran sectores previamente asignados facendo un levantamento de toda a información relevante que pode ser incluída no mapa: nomes de rúas, números dos portais, sentidos da circulación, establecementos ou edificios públicos. A xornada, que servirá para compartir múltiples experiencias arredor do cartografado dixital e a programación libre, dará comezo arredor das 10.00 horas na Residencia Altamar. Os asistentes deberán acudir con GPS e cámara de fotos dixital, amais do computador persoal de seu (que se poderá deixar na residencia). Poderase seguir toda a información do evento a través do sitio de seu no G+. Esta actividade, así como o ciclo de Sábados Libres na Altamar, forma parte das actividades que GALPon realiza no marco do Convenio de colaboración asinado coa AMTEGA para a difusión do software libre e incluídas no Plan de Acción de Software Libre 2014 da Xunta de Galicia.