Igalia desenvolve un lector de correo electrónico para os Nokia N800/N810

A aplicación cliente de correo Modest xa está dispoñible para a súa descarga para equipos co sistema operativo OS2008/Chinook, ou sexa, para funcionar nos dispositivos Nokia N800 e N810, de xeito que os usuarios destes interesantes trebellos que levan a Internet á palma da man poden probar o lector de e-mail desenvolvido por Igalia que permite descargar mensaxes de contas tanto POP coma IMAP, polo que é unha solución moi atractiva para acceder ó correo de GMail dende os Internet Tablets de Nokia.
Modest é unha aplicación código aberto baseada en Tinymail, pensada para funcionar en dispositivos de poucas prestacións, optimizando os recursos ó máximo. Tamén destaca por ser asíncrono (a interface de usuario segue a funcionar mentres o Tinymail funciona en background), doado de configurar, operativo tanto con pluma como cos dedos e mesmo tamén é unha aplicación de escritorio.
Co lanzamento da versión de proba de Modest concrétase a colaboración de Nokia coa empresa coruñesa Igalia iniciada en outubro de 2006, e ante a satisfactoria experiencia dende Igalia procurarán continuar a traballar con Nokia no futuro, así como contribuír á plataforma Maemo (empregada polo OS2008).