Kodi chega a Xbox One

A aplicación Kodi, que facilita a organización e reprodución de contidos multimedia (e que fíxose especialmente popular polos engadidos que permiten o acceso a contidos audiovisuais de orixes irregulares) leva máis dun ano presente na tenda de Windows 10 como unha aplicación que funciona en ordenadores, móbiles e HoloLens que vén de incorporar unha nova plataforma: Xbox One.
Deste xeito, o Kodi para Windows 10 funciona tamén na consola de Microsoft, facendo así máis accesibles os contidos audiovisuais aos televisores do fogar, de xeito que para gozar de Kodi no salón xa non haberá que empregar dispositivos con Android ou conectar un ordenador ao televisor, xa que pode aproveitarse que a consola de videoxogos xa é un trebello conectado habitualmente a pantallas grandes.
A nova versión de Kodi aínda está nunha etapa inmatura, pero resulta operativa, de xeito que tanto podemos aproveitar a ferramenta para acceder ás nosas fotografías, a nosa música e os nosos vídeos dun xeito ordenador, como para gozar dos engadidos que abren o acceso a moitos contidos en liña, entre os que non faltan fluxos de vídeo piratas, manténdose a aplicación neutral ao uso que se faga da mesma (de aí que estea dispoñible para a consola de Microsoft).