LibreCon2014 quere converter Bilbao no meirande escaparate de casos de éxito de software libre

Andabamos por semellantes datas do ano 2012 anunciando a Libre Software World Conference de Santiago de Compostela, sen dúbida un dos grandes eventos dese ano o en materia non só de programación aberta, senón de novas tecnoloxías en xeral; e agora volvemos a retomar o fío deste congreso para dar conta da súa nova entrega, a cuarta, que se vai celebrar os días 11 e 12 de novembro na cidade de Bilbo (Bilbao en castelán) estreando nome (LibreCon 2014, Bussiness and Open Technologies Conference) e, como era de agardar, o importante ingrediente éuscaro que lle dan o emprazamento, o contexto, os participantes e os organizadores. Estes últimos son ASOLIF e ESLE, asociacións de empresas de software libre estatal e de Euskadi, respectivamente. Lembrar que a edición galega do congreso veu da man da asociación galega AGASOL.
Segundo informa Mancomún, a convocatoria 2014 vén acompañada dun “ambicioso obxectivo”. Este é: converterse no maior e mellor evento de Europa en materia de casos de éxito botando man de tecnoloxías libres. En definitiva, o que se busca é acadar a conferencia sobre programación aberta de natureza máis práctica nunca acadada antes. En última instancia, preténdese que o congreso “contribúa a dinamizar o sector das tecnoloxías libres en continuo crecemento, a través da xeración de negocio en todos os sectores”. E, tamén, a través de amosar en detalle o que poden facer estes ferramentas no desenvolvemento e no éxito de proxectos e iniciativas empresariais. Haberá como de costume relatorios e obradoiros, amais de demostracións e actividades paralelas, pero o nexo común de todas estas accións, alén do propio software libre (base do congreso e das súas partes), será a vontade de ir ao gran e visualizar claramente o potencial específico do software libre.
ata o día 15 de setembro é posible remitir propostas para participar na conferencia, que serán logo avaliadas pola organización para conformar o programa do evento, que estará estruturado en dúas grandes áreas: conferencias e obradoiros e demos técnicas. A LibreCon2014, engade Mancomún reflectindo información achegada polos organizadores (dossier en pdf), terá tamén un espazo de exposición concibido como espazo innovador e aberto, “un espazo incomparable para a xeración de coñecemento e oportunidades de negocio”.