MeLiSA prepara a segunda Xornada de Usuarios de R en Galicia
mércores, 2 de setembro do 2015
O día
1 de outubro o Centro de Novas Tecnoloxías de Galicia (CNTG) de
Santiago de Compostela acollerá a II
Xornada de Usuarios de R en Galicia. Organizada pola Asociación
de Usuarios de Software Libre da Terra de Melide (MeLiSA), e
patrocinada pola AMTEGA (Xunta
de Galicia) incluirá relatorios e obradoiros co fin de promover o
coñecemento da linguaxe estatística R e as súas aplicacións.
Cómpre engadir que este encontro quer servir de punto de unión para
todas aquelas persoas interesadas en intercambiar as súas
experiencias e atopar colaboracións co resto da comunidade.
Esta iniciativa enmárcase
no convenio de colaboración asinado entre a AMTEGA e MeLiSA para a
realización de actividades de fomento do software libre en Galicia
que forman parte do Plan de Acción en Software Libre 2015.
Dende a organización do
evento convidan a compartir ideas sobre esta xornada, presentar unha
charla sobre algún tema de interese ou organizar un obradoiro, para
iso é preciso contactar con eles a través do formulario de
contacto. A inscrición é de balde, e de libre acceso.
Dende este intre o
programa do evento irase actualizando. Asemade, dicir que a relación
de actividades de 2013 xa se atopa publicada (incluíndo as
presentacións de cada relator). Respecto do programa do novo evento,
dará comezo ás 9.30 horas coa chegada de asistentes e recollida de
material para seguir ás 10.00 horas coa sesión de apertura a cargo
de Rafael Rodríguez, presidente de MeLiSA, Miguel Ánel Rodríguez,
membro do comité organizador (MeLiSA) e Alfonso Blasco, director do
CNTG. Logo intervirán (novamente) Rafael Rodríguez (Atréteve
con R), Salvador Naya e Javier Tarrío (Aplicacións de R
fiabilidade), Marcos Fernández (Uso de R na administración:
procesamento de expedientes e automatización de tarefas) ou
Isabel Martínez (PREBED, software de avaliación odontolóxica).
Segundo recorda o
colectivo de Melide, R é un software orixinariamente deseñado para
a análise estatística e a realización de gráficos e que nestes
intres estase a utilizar en numerosos eidos relacionados coa
estatística (xenómica, biomedicina, econometría, big data,
bioloxía, ...). R ten unha natureza dupla de programa e de linguaxe
de programación e distribúese baixo licenza GNU-GPL, engade MeLiSA.
