MeLiSA prepara xa a sexta edición das Xornadas de Usuarios de R, en outubro en Santiago

Os vindeiros días 23 e 24 de outubro de 2014 celebraranse en Santiago a sexta edición das Xornadas de Usuarios de R, que terán lugar no Centro de Novas Tecnoloxías de Galicia emprazado no barrio de Conxo. Estes encontros incluirán no seu programa diversos relatorios e obradoiros dirixidos a promover o coñecemento de R e as súas aplicacións, proporcionar un punto de encontro entre os usuarios desta plataforma e fomentar a colaboración “nun ambiente multidisciplinar”. Sinalar que R é un paquete estatístico e unha contorna informática libre que inclúe entre outras cousas ferramentas de análises de datos e xeración de gráficas.
Ademais, funciona baixo Windows, MAC VOS e Linux. Os seus usuarios coinciden en salientalo como ferramenta moi indicada para os ámbitos docentes, xa que é de balde e de moi doado uso para tódolos integrantes da comunidade educativa. R é unha linguaxe e un conxunto de módulos estatísticos que deixa marxe para realizar análises de datos e representación dos mesmos.
Volvendo ás xornadas, dicir que tamén son gratuítas, aínda que requiren inscrición. Para quen non poida acudir en persoa, dicirlle que as sesións poderanse seguir en streaming (previa inscrición e selección da modalidade asistencia a distancia). Están convidados a participar usuarios e entusiastas de R de todos os ámbitos -universidade, institutos de investigación, administracións públicas, empresa privada- e coa finalidade de compartir coa comunidade aplicacións e exemplos interesantes “que reflictan a madureza de R e a diversidade dos problemas e dos eidos nos que vén utilizándose con éxito”, sinalan os organizadores: a asociación galega MeLiSA e máis a Comunidade R-Hispano.