Nova versión de Map Sheets, o complemento de gvSIG de raizame galega

Temos nova versión de Map Sheets, o complemento de raizame galega do paquete de aplicacións gvSIG desenvolvido pola asociación do mesmo nome co obxectivo de permitir un Sistema de Información Xeográfica en software libre e dando acubillo a todo tipo de recursos e servizos para o coñecemento tecnolóxico do territorio: WMS (Web Map Service), WFS (Web Feature Service), WCS (Web Coverage Service), Servizo de Catálogo e Servizo de Nomenclátor, etc. Pois ben, volvendo ao complemento Map Sheets, dicir que se encamiña a dar forma de xeito automático a series de mapas que cubran unha área de interese, posibilitando a variación dos valores dos campos por cada folla e permitindo gardalos en formato pdf ou imprimir.
Segundo lembran dende Mancomún, este complemento foi creado en 2011 pola asociación gvSIG, a través da colaboración da empresa Prodevelop SL e o laboratorio Cartolab da Universidade da Coruña, co financiamento da Deputación Provincial de Pontevedra e na por aquel entón Dirección Xeral de Sostibilidade e Paisaxe, e actualmente Instituto de Estudos do Territorio, da Consellería de Medio Ambiente, Transporte e Infraestruturas da Xunta de Galicia. Esta primeira versión funcionaba só para a gvSIG 1.2. O pasado mes de xullo, anunciouse a súa actualización para a familia gvSIG 2.0 que acubilla novidades a ter en conta como a posibilidade de rotar o marco asociado a cada folla durante o axuste da mesma de xeito que nese mapa que se xerará automaticamente igual que antes, o Norte non será necesariamente a marxe superior da folla, aínda que o mapa siga tendo forma rectangular.