O CESGA dá acubillo este luns á entrega de galardóns do Máster en Computación de Altas Prestacións
venres, 15 de marzo do 2013
O Centro de
Supercomputación de Galicia (CESGA)
acolle este luns, a partir das 16.00 horas, o acto de entrega dos
Premios aos Mellores Proxectos de Fin de Máster en Computación de
Altas Prestacións. A axenda de actividades dará comezo cun acto de
apertura a cargo de Javier Díaz Bruguera, catedrático no centro de
investigación da Universidade de Santiago CiTIUS. Este máster,
informa o CESGA, é na nosa terra o único programa formativo das
súas características realizado por dúas universidades (UDC e USC),
unha infraestrutura científico-tecnolóxica singular como é o CESGA
e co apoio e participación de 7 empresas multinacionais (IBM, HP,
BULL, Fujitsu, AMD, Amazon e Gompute). Asemade, cómpre engadir un
colexio profesional (CPEIG).
Un xurado composto por
membros do profesorado e técnicos de recoñecida experiencia nas
empresas patrocinadoras decidirá os proxectos premiados de entre o
grupo de finalistas que presentarán o seu proxecto. Os
recoñecementos inclúen equipos tecnolóxicos de última xeración
(como tablets e portátiles) e mesmo estancias de traballo
pagadas dun mes de duración “nun centro punteiro de
benchmarking e testeo de produto en Grenoble (Francia) do fabricante
de supercomputadores Bull”, engade o CESGA. No acto
repartiranse catro premios; HP, AMD e Fujitsu entregarán tres deles
aos mellores proxectos fin de máster e a europea Bull fará entrega
dun galardón ao mellor expediente académico.