O CITIC da UDC incrementa a captación de talento internacional grazas ao proxecto europeo 3i-ICT
luns, 17 de xullo do 2023
O
Centro
de Investigación en Tecnoloxías da Información e as Comunicacións
(CITIC) da UDC incrementou a súa captación de talento internacional
a través do proxecto europeo 3i-ICT. Na segunda edición deste
programa (cuxa recepción de candidaturas pechouse hai pouco) o
centro da Universidade da Coruña recibiu 75 candidaturas de 56
solicitantes, das cales 51 solicitudes de 39 persoas foron admitidas.
O
programa europeo, o primeiro outorgado a unha institución galega co
apoio da UE a través do Horizon 2020-MSCA-COFUND, ha recibo un 15%
máis de solicitudes respecto á primeira edición.
Segundo
informaron fontes do CITIC, as candidaturas proceden de todo o mundo,
destacando as propostas recibidas de Asia (máis da metade), seguidas
de Europa, América e África. Por áreas de investigación, foron as
de Intelixencias Artificial e Ciencia e Enxeñería de Datos (CID) as
que suscitaron máis interese, seguidas das de Computación de Altas
Prestacións e Servizos e Redes Intelixentes.
Unha
vez finalizado o proceso de recepción de candidaturas e tras unha
primeira avaliación, seleccionáronse aquelas que cumpren cos
requisitos para avanzar á seguinte fase de selección.
Será
agora un comité externo composto por persoas expertas en cada unha
das distintas áreas o que se ocupe da seguinte etapa. A medida que
avanza o proceso de avaliación, este comité examinará a formación
académica e a experiencia de cada persoa candidata. O CITIC destaca
neste punto que “unha vez seleccionados, os participantes neste
programa de doutoramento internacional terán a oportunidade única
de colaborar e abordar en desafíos do mundo real da man dun centro
de investigación que potencia o avance e a excelencia en I+D+i
aplicada ás TIC”. Respecto diso, o director do CITIC, Manuel F.
González Penedo, resalta a longa traxectoria de investigación
multidisciplinar do centro en áreas de vangarda: “O noso
compromiso coa excelencia na investigación levounos a ser líderes
en eidos tan diversos como a biomedicina, a Industria 4.0, o
Procesamento da Linguaxe Natural e a sustentabilidade. A excelencia
das investigacións e as oportunidades de vangarda ofrecidas no CITIC
posicionaron o centro como un referente internacional, xerando un
ambiente estimulante e diverso que enriquece aínda máis a calidade
da investigación realizada”.
Innovador
programa de doutoramento internacional
O
3-i ICT (Programa de Doutoramento en Tecnoloxías da Información e
as Comunicacións Internacional,
Interdisciplinario e Intersectorial) é un innovador programa de
doutoramento internacional que ofrece oito bolsas a persoal
investigador predoutoral para levar a cabo os seus estudos de
doutoramento no Centro de Información e Investigación en
Tecnoloxías da Información e as Comunicacións (CITIC) da
Universidade da Coruña. Conta co apoio da Unión Europea a través
do Horizon 2020 baixo un acordo de Marie Sklodowska-Curie
(H2020-MSCA-COFUND), que proporciona financiamento para programas
rexionais, nacionais e internacionais de formación e desenvolvemento
profesional mediante mecanismos de co-financiamento.
Ademais,
o 3i-i ICT conta co co-financiamento da Consellería de Cultura,
Educación e Universidades da Xunta de Galicia.
Modelos
para a prevención da artrite, Procesamento da Linguaxe
Natural e sensores virtuais sen fíos,
primeiras teses
A
finais do pasado mes de maio presentáronse os tres primeiros
proxectos de teses dos oito proxectos de investigación previstos
neste programa europeo, que ofrece unha ampla formación en
habilidades investigadoras e de transferencia e que “suporá”, en
palabras do CITIC, “unha sólida vantaxe competitiva no
desenvolvemento profesional dos participantes”. Os modelos para a
prevención da artrite, Procesamento da Linguaxe Natural e sensores
virtuais sen fíos centraron estes primeiros traballos do 3i-ICT.
Toda
a información do proxecto está dispoñíbel na
súa páxina web.