O CNTG acolle o 25 un seminario sobre o proxecto de desenvolvemento web vNext

O Centro de Novas Tecnoloxías de Galicia, CNTG, vai acoller o vindeiro 25 de febreiro un seminario sobre vNext, un proxecto encamiñado a favorecer o desenvolvemento de webs baseadas en software libre e con alcance multiplataforma. A xornada divulgativa, que se vai celebrar no salón de actos do CNTG en horario de 16.30 a 20.00 horas, terá o prazo de inscrición aberto ata as doce horas do martes 24. Segundo nos lembra a organización do seminario, vNext “supón a creación dun novo marco de traballo para o desenvolvemento web, optimizado para traballar na nube, con maior rendemento, menor consumo de memoria, multiplataforma e de código aberto”.
O obxectivo principal do seminario consiste en darmos a coñecer aos asistentes en que consiste e cales son as melloras que aporta vNext, amosándose exemplos de aplicacións funcionando en Mac, Linux e Windows. A xornada vai dirixida particularmente a analistas, desenvolvedores/as e programadores/as interesados/as no desenvolvemento de aplicacións e servizos web en contornas híbridas e, en xeral, a profesionais IT con interese na temática.
O relator da xornada será o galego Unai Zorrilla Castro, socio fundador da empresa Plain Concepts, en palabras do CNTG “unha das firmas máis importantes en desenvolvementos Microsoft, con sedes en España, USA e Dubai”. Autor de varios libros, Unai impartiu numerosas conferencias e charlas técnicas en todo o mundo, sendo recoñecido por Microsoft como MVP (most valuable professional) durante máis de unha década.
O acceso ao seminario, previa inscrición a realizar en liña a través do portal web do CNTG, é de balde e condicionado ao aforo do local. O acceso ao acto para aquelas persoas non inscritas estará condicionado á existencia de prazas libres o día de realización do evento.