O CPEIG organiza un curso de Business Intelligence baseado en software libre

A situación de crise económica e financieira actual non é, se cadra, o mellor contexto para que as empresas arrisquen o seu capital e se metan de cheo a negocios que lle quedan grandes ou que invistan demasiado en ferramentas de última tecnoloxía que precisan dunha formación moi especializada dos seus usuarios.
Nembargantes, agora si semella ser o mellor momento para que as empresas formen ao seu persoal en materia de sistemas de xestión informatizados xa que o futuro está aí e, incluso na actualidade, xa se fai necesario tomar decisión importantes e rápidas a partir da información dispoñible nos devanditos sistemas, tales como ERP, aplicacións operativas…
Neste senso, o Colexio Profesional de Enxeñaría en Informática de Galicia (CPEIG), que é consciente da necesidade de aplicar este tipo de ferramentas nas empresas galegas, vén de anunciar que a partir de mañá venres, vai levar a cabo o curso Business Intelligence, integrado no Programa de Formación do devandito ente colexial para o presente ano 2009, ao que acudirán un total de 26 alumnos e alumnas.
A actividade formativa desenvólvese en colaboración coas empresas Bahía Software e Strate BI e o seu obxectivo principal será formar aos asistentes na análise de datos e na toma de decisións empregando software libre.
O curso terá lugar en Santiago de Compostela durante os días 29 e 30 de maio, e 5 e 6 de xuño, nas dependencias da academia Cefiasa.
Business Intelligence implica, segundo afirman os seus responsables, “a mellora da velocidade e da capacidade das organizacións para tomar decisións, simplificando e integrando servizos na mesma plataforma, e proporcionando interfaces abertas para acceder e compartir datos, dentro da mesma organización ou con outras organizacións externas”.
Na imaxe, o xerente de Bahía Software, Gustavo Gómez, vista na web do xornal en liña De luns a venres.