O Clúster e AGASOL xuntan forzas a prol do noso sector TIC
martes, 16 de decembro do 2014
- O presidente de AGASOL e o seu homólogo do Clúster TIC na formalización do pacto celebrada este martes
Obxectivo:
o medre e fortalecemento das nosas empresas do eido
tecnolóxico-dixital. Esta é base, a razón de ser, do importante
acordo asinado este 16 de decembro entre o Clúster
TIC Galicia e a Asociación de
Empresas de Software Libre (AGASOL), unha alianza feita á medida
“da mellora da competitividade e ao crecemento do hipersector
galego das Tecnoloxías da Información e das Comunicacións (TIC)”.
Así definiron este achegamento e esta suma de forzas os presidentes
de ámbalas entidades, Antonio Rodríguez del Corral, e Xavier
Castaño García, respectivamente. Trátase dun convenio de duración
indefinida que prevé a converxencia de actividades e o
desenvolvemento de sinerxias.
En
virtude do acordo, AGASOL e o Clúster pasarán “a traballar de
forma integrada e coordinada, como se dunha soa organización se
tratase, e falarán cunha voz única a nivel institucional, asumindo
o Clúster a representatividade no sector de ambas as dúas
entidades”. Ademais, esta última plataforma galega creará no seu
seo interno un grupo de interese de software libre, así como un
voceiro para esta materia, que participará nas reunións do seu
Comité de Dirección. Os socios de AGASOL pasarán de xeito
automático a selo tamén do Clúster.
Segundo
engadiron del Corral e Castaño, “AGASOL manterá a súa xeración
de proxectos e actividades, que se fará no seo da estrutura do
Clúster e de forma aberta a todos os asociados”. Unha comisión
paritaria de seguimento traballará polo bo desenvolvemento do
convenio.
Antonio
Rodríguez del Corral fixo saber que a sinatura do convenio supón
“un importante avance cara a establecer marcos de colaboración
entre as entidades do sector que axuden ás empresas a desenvolver
produtos e servizos innovadores e con capacidade para aproveitar as
oportunidades que ofrecen os mercados”. E engadiu: “Para o
Clúster e para os clientes dos seus socios é importante contar coa
experiencia de AGASOL, porque cada vez mais proxectos de cliente, de
electrónica ou no ámbito das Cidades Dixitais ou dos centros de
procesamento de datos execútanse
total ou parcialmente en software libre”.
Pola
súa banda, Xavier Castaño García describiu o convenio como un paso
adiante para a entidade, “xa que abre as portas a consolidar o peso
específico que a programación aberta e ten no sector TIC galego”.
Asemade -sinalou Castaño- abre unha canle de estreita colaboración
“co resto do sector que esperamos axude a facer crecer a
implantación e o desenvolvemento de software libre en Galicia".