O DOG en papel ten os días contados
luns, 21 de febreiro do 2011
Abril de 2011 vai ser a data na que, definitivamente, o Diario Oficial de
Galicia (DOG) se deixará de publicar en papel para publicarse unicamente en
formato dixital.
Así se recolle
no Diario Oficial da Unión Europea (DOUE), que vén de publicar o concurso que
suporá a desaparición da edición impresa do DOG e o establecemento da súa edición
electrónica como única publicación (tal e como xa recollía o decreto que regula
o desenvolvemento da Administración electrónica na Xunta de Galicia e nas
entidades dela dependentes).
Coa creación do
DOG electrónico, a Xunta garantirá un servizo público universal, de consulta
gratuíta e libre acceso a través da Rede, sen límites temporais nin
territoriais; “que suporá a
simplificación dos procesos de produción, a redución dos tempos de edición e a
racionalización do seu gasto, ao suprimir os custos superfluos”, afirman.
Os servizos
obxecto do concurso, que requiren un alto grado de especialización, resúmense
nas fases de corrección, composición e maquetación, sinatura e, finalmente,
novo cotexo galego-castelán antes da súa publicación na Web.
A dixitalización
do DOG, que a Consellería de Presidencia, Administracións Públicas e Xustiza leva
a cabo dacordo “cos criterios de
austeridade e economía” que inspiran as súas últimas actuacións en materia
de relacións coa cidadanía, supón un paso máis no obxectivo do Executivo por
acadar unha administración máis moderna e reducir o gasto público.