O GPUL celebra o 9 de abril un Hackaton open source sobre a Internet das Cousas

O Grupo de Programadores e Usuarios de Linux (GPUL), con sede de operacións na Facultade de Informática da Coruña, está esta tempada mergullado de cheo na promoción da tecnoloxía aberta con vistas a facer da nosa terra un polo de desenvolvedores libres. Falamos dos GPUL Labs, actividades de divulgación e formación open source que, en palabras do grupo, están “a ter unha gran acollida e repercusión no entorno tecnolóxico galego”. Co obxectivo de chegar o máis lonxe posible nos ditos obxectivos, o grupo xa ten publicada unha nova remesa de actividades, todas ao redor dun proxecto baseado en tecnoloxías libres, así como un primeiro Hackathon de desenvolvemento sobre Internet das Cousas (IoT) na cidade da Coruña, unha cita na que se convidará aos asistentes a deseñar pequenos prototipos baseados en software e hardware libre. Será, comentan os organizadores, “un día completo de traballo colaborativo”.
Por certo que a entrada ao Hackaton, que se celebra o 9 de abril, é totalmente de balde. Ademais, os participantes disporán de hardware para desenvolver o seu proxecto, como por exemplo Raspberrys, Arduinos e sensores para facer probas. A organización, que tamén asume os gastos relacionados coa manutención durante a xornada, busca con esta actividade “facer piña e crear unha comunidade de desenvolvedores preocupados polas tecnoloxías libres e que impulsen proxectos de código aberto”. A actividade conta co apoio orzamentario da firma galega LibreBit, centrada na achega de solucións tecnolóxicas open source. Tamén colaboran a Facultade de Informática, a Universidade da Coruña, a axencia AMTEGA e a Xunta de Galicia.
Polo que se refire á devandita nova remesa de actividades que prepara o GPUL, sinalar que no programa inclúense charlas core (Intro a Python, Git e, GitHub, Programando una Raspberry, Git avanzado e code review, Scrum/metodoloxías áxiles, Django Framework, APIs REST e ReactJS) e charlas adicionais (Tests en Django e Travis CI, Android / Firefox OS, Docker e despregue de aplicacións, LaTeX, MongoDB, etc).