O futuro da información dixital, a exame na Cidade da Cultura
luns, 4 de abril do 2011
Os vindeiros días
7, 8 e 9 de abril, a Cidade da Cultura de Galicia, que por certo segue a sumar seareiros
no seu perfil de Facebook, vai reunir no seu seo ás bibliotecas dixitais máis
importantes do mundo, entre as que se atopan a Biblioteca do Congreso dos
Estados Unidos; a British Library do Reino Unido ou a World Digital Library da
Unesco, entre outras.
O motivo desta reunión
(pioneira no noso país) non é outra que a celebración dun seminario sobre información
dixital (algo que só se podía facer neste marco incomparable para promocionar a
cultura actual) ao que tamén se achegarán compañías especializadas na
dixitalización de fondos, como Google Books ou Europeana, a biblioteca dixital que impulsa a Comisión Europea.
O seminario
contará tamén coa Biblioteca Nacional de España e será, en palabras dos seus
organizadores, “unha oportunidade
perfecta presentar Galiciana, a biblioteca dixital galega, que por volume de
fondos é xa unha das mais potentes de España e de Europa”.
A conferencia
inaugural virá da man da estadounidense Sally McCalum, representante da Biblioteca
do Congreso dos Estados Unidos, quen centrará a súa intervención nas
estratexias que existen para facerlle as bibliotecas mais accesibles aos
usuarios.
Por outra banda , tal e como detalla o programa
dispoñible en Bibliotecasdixitais.com, o director da World Digital Library
da Unesco, John Van Oudenaren, exporá perante as persoas asistentes o proxecto Biblioteca dixital mundial, e o alemán
Stefan Gradmann, presentará o Libro
branco de Europeana.