O novo deseño da web de AGADIC inclúe a recuperación do legado de Flocos.tv
venres, 5 de agosto do 2011
A Axencia Galega das Industrias Culturais,
AGADIC, vén de estrear páxina web. A nova andaina en liña da entidade
dependente da Consellería de Cultura, mantendo o enderezo de costume, www.agadic.info, inclúe unha remodelación do
aspecto gráfico e, tamén, do artellamento dos contidos, dando acubillo a partir
de agora a máis seccións multimedia, a conexións directas coas redes sociais e
a informacións de actualidade procedentes do propio sector a través do apartado
Olladas. Asemade a nova páxina de AGADIC acollerá, a través
de Canle TV, o catálogo audiovisual aloxado na desaparecida plataforma Flocos.tv.
Amais de todo isto, a páxina remodelada tamén
incorporará avisos relacionados coa actividade da Axencia e carteleira.
Volvendo a Canle TV, dicir que en breve
poderemos tirarlle o máximo partido, tal e como sinalan os responsábeis directos
de AGADIC, que está neste intre a desenvolver “os axustes técnicos precisos para a visualización deste catálogo
audiovisual de xeito directo dende a páxina, a través desta nova sección
denominada Canle TV”.
A web da Agadic incorpora, como avanzamos ao
comezo, dous novos apartados multimedia –Galería e Vídeos–, así como as
ligazóns ás redes sociais ás que a entidade da Consellería de Cultura se
incorporou recentemente a través dunha canle propia en YouTube e unha páxina en
Facebook.
Asemade, informa a Axencia, “reestruturouse e actualizouse a información
de carácter institucional e de servizo ao sector, que agora conta cun acceso
directo ao apartado de Axudas, a través do que se informa puntualmente do
estado das distintas convocatorias de subvencións da Agadic ao sector
(industrias culturais e audiovisual)”.