O persoal docente do campus de Ourense descubre as vantaxes de Linux

A Vicerreitoría de Formación e Innovación Educativa da Universidade de Vigo, a fin de presentarlle ao seu persoal docente as vantaxes de empregar software libre en lugar de software de propiedade ou software pirata, vai organizar o curso Linux na docencia universitaria, unha actividade destinada ao persoal do campus de Ourense que se desenvolverá durante os días 8 a 22 de abril.
Xosé Antón Vila Sobrino, profesor de Linguaxes e Sistemas Informáticos da Escola Superior de Enxeñaría Informática, vai ser o encargado de impartir a docencia do curso, cuxo prazo de matrícula remata o día 1 de abril, e de achegarlle ás persoas asistentes as claves para aprender a usar esta ferramenta.
A intención deste curso, que consta de 10 horas lectivas, é, segundo informou Vila Sobrino, “transmitirlles aos docentes a facilidade que teñen para pasarse a Linux xa que se instala como un programa máis de Windows”.
Trátase dun sistema operativo libre que lle outorga ao usuario a posibilidade de usar o programa, estudar como funciona, modificalo, distribuir copias do mesmo e incluso melloralo, polo que se convirte na ferramenta “ideal” para que os docentes acostumados a traballar co Windows non atopen ningún problema á hora de adaptarse a este novo software, que ademais é de balde.
O curso consta de 20 prazas que se irán cubrindo por orde de inscrición, e abordará temas que van dende a introdución ao Linux e a súa instalación, ata o sistema de arquivos, a administración do sistema e as utilidades do programa (compresión de arquivos, copias de seguridade, mensaxería instantánea e multimedia).