O software e o hardware libre socioeducativo centrarán as terceiras xornadas de LiGNUx

Fachada do Edificio Politécnico do Campus de Ourense

Será neste mes de outubro, os días 18 e 19, cando teñan lugar as terceiras Xornadas de achegamento teórico-practico ao software e hardware libre no ámbito socioeducativo, un encontro organizado pola Asociación Educativa LiGNUx co apoio da Asociación Pedagóxica e Cultural Educere, Grupo de Programadores e Usuarios de Linux (GPUL), a Universidade de Vigo (Vicerreitoría do Campus de Ourense, Escola Superior de Enxeñería Informática e a Facultade de Ciencias da Educación), amais da Xunta e a Axencia para a Modernización Tecnolóxica de Galicia (AMTEGA). Esta xuntanza levarase a cabo os días 18 e 19 de outubro, entre as 18:30 e as 21 horas no Edificio Politécnico (Universidade de Vigo, Campus de Ourense) na Aula 2.1 (2º andar).
Cómpre subliñar que a inscrición a estas xornadas é totalmente de balde (do mesmo xeito que a entrega de material) e remata o prazo o día 17 de outubro. O programa de actividades é o seguinte:
- Martes 18 de outubro: Conferencia Ferramentas de software e hardware libre para a formación en novas tecnoloxías, impartida por un experto en software libre. Historia do software, potencial, programas e sistemas operativos abertos e vantaxes fronte ao software privativo.
Repartición de material: Entrega de DVDs con programas libres, sistemas operativos GNU Linux e manuais.
- Mércores 19 de outubro: Charla introdutoria de Pablo Castro, secretario adxunto de GPUL (Grupo de Programadores e Usuarios de Linux). Introdución ao mundo do software, hardware e cultura libre, contribución en proxectos, asociacións...
Obradoiro de software libre: 1- Explicación dos relatores do contido do DVD e instrucións de instalación e funcionamento dos programas contidos. 2- Traballo autónomo dos asistentes ao curso instalando o material fornecido coa axuda dos relatores (membros da Asociación LiGNUx, GPUL e enxeñeiros informáticos).