O software libre chega a máis de 250 alumnos grazas a GHANDALF

GHANDALF -entidade sen ánimo de lucro que traballa a prol dunha Sociedade do Coñecemento baseada nos principios de libre acceso e uso do software e da información- informou que nestas últimas semanas máis de 250 alumnos pertencentes a diferentes niveis da ESO e de ciclos superiores (tamén algúns profesores destes centros), recibiron por parte da dita asociación GHANDALF unha serie de charlas formativas en materia de programación aberta.
Así, o pasado 1 de outubro, no CPI Alcalde Xosé Pichel de Coristanco, tiña lugar a primeira destas charlas, na que arredor de 100 alumnos de 1º e 2º da ESO e parte do profesorado, recibiron unha charla de introdución ao software libre: que é o software libre, como se obtén, que vantaxes achega e mesmo darse conta de que o estaban a empregar a diario sen ser conscientes dilo. Na segunda parte da charla viron exemplos de ferramentas libres que se poden empregar para as tarefas máis habituais: ofimática, navegación por internet, retoque fotográfico, xogos, etc.
Por outra banda, no IES Xulián Magariños de Negreira onte, 14 de outubro, levábanse a cabo outras dúas sesións, nas que participaron máis de 150 persoas en total. A primeira delas encamiñada a alumnos e profesorado de 4º de ESO e 1º de Bacharelato baseouse nos mesmos contidos introdutorios que no caso anterior, pero adaptados á maior idade dos alumnos asistentes. Coa charla puideron coñecer máis polo miúdo que é o software libre e como pode abranguer todas as súas necesidades tecnolóxicas achegándolles grandes vantaxes. A segunda das sesións estivo dirixida aos alumnos do Ciclo Superior de Informática (ASIR) e ao profesorado de informática. O contido desta charla virou máis técnico: aspectos legais da programación aberta, licenciamento, desenvolvemento en comunidade, etc. O obxectivo foi que os alumnos, dado que no futuro estarán a traballar no sector TIC, teñan un coñecemento maior sobre o software libre, así como unha base para chegar a entender a casuística en canto aos aspectos legais, licenciamento e ferramentas de desenvolvemento en comunidade.
Cómpre dicir que este tipo de actividades non son novas para a asociación GHANDALF, xa que dende o seu nacemento no ano 2009 as charlas formativas dirixidas ao alumnado, profesorado e mesmo profesionais de diversos sectores veñen sendo un dos seus sinais de identidade.
Engadir que estas charlas forman parte das actividades que a asociación GHANDALF realiza no marco do Convenio de colaboración asinado coa AMTEGA para a difusión do software libre e incluídas no Plan de Acción de Software Libre 2014 da Xunta de Galicia.