Open TDT axuda ás administracións locais a crear servizos interactivos para a TDT

luns, 13 de xullo do 2009 Marcus Fernández

A adopción da Televisión Dixital Terrestre interactiva a través do estándar MHP é unha asignatura pendente que ten a TDT en España, e para avanzar neste eido lanzan Open TDT, unha plataforma baseada en compoñentes de código aberto que busca ofrecer un contorno de desenvolvemento de servizos ao cidadán por parte de administracións locais combinando JDK 1.5.0_11, OpenCMS 6.2.2, JBOSS 4.0.5.GA e MySQL 4.1.12, de xeito que as administracións que desexen aproveitar o potencial da TDT para levar novos servizos ao cidadán terán moito máis doado facelo, segundo informaron hoxe mesmo dende Mancomún.
Por desgraza a TDT interactiva está ausente de case todos os fogares españois, pero é de agardar que segundo vaian aparecendo novos servizos os usuarios vaian animándose a adquirir receptores que soporten MHP, estándar que tivo moitos atrancos para a súa comercialización, en boa medida porque o seu uso por parte dos difusores precisaba do pagamento dunha licenza, o que dende hai pouco máis dun ano foi eliminado para as canles que emitan en aberto, medida coa que pretenden resucitar esta tecnoloxía.
Open TDT conta con 3 niveis de aplicación (interactivas, interoperabilidade e backoffice), desenvolvemento baseado no patrón Modelo-Vista-Controlador, está orientado a servizos web, baséase en comunicacións SSL, é escalable, multiplataforma, multiusuario e multiproceso.