Os Xoves Libres de GPUL abordan a vindeira semana as utilidades de LaTeX
venres, 2 de maio do 2014
GPUL
(Grupo de Programadores e Usuarios de Linux) segue adiante co seu
ciclo de Xoves Libres na Facultade de Informática da Coruña (FIC),
un programa de citas divulgativas e formativas para afondar nas
múltiples vantaxes de diferentes plataformas e ferramentas de
software libre perante a comunidade (estudantes, internautas,
desenvolvedores, emprendedores, empresarios) potencialmente usuaria
de software libre. Sen ir máis lonxe, o vindeiro xoves 8 celebrarase
outro dos relatorios do ciclo, desta volta xirando arredor de LaTeX,
un sistema de preparación de documentos “de moi alta calidade”,
informa GPUL.
A sesión (Obradoiro
de introdución a LaTeX) virá da man do mestre Emilio J. Padrón
González, profesor na Facultade de Informática da Coruña e membro
activo do Grupo de Programadores e Usuarios de Linux, que fará unha
introdución e un percorrido polas utilidades do sistema de
composición de textos, “que hoxe en día é amplamente empregando
en ámbitos científicos”, engade a organización, que explica
tamén que se “usa moi decote en documentos técnicos ou
científicos pero que pode empregarse tamén para calquera outra
publicación”. Ademais, é unha ferramenta moi axeitada para
publicarmos o nos proxecto de fin de carreira ou calquera tese de
doutoramento.
