Os altofalantes Google Home chegan a México tras o decepcionante lanzamento español

A semana pasada estreáronse en España os altofalantes Google Home e Google Home Mini, a un prezo de 149 e 59 euros repectivamente, e cunha grande presenza comercial tanto en liña como en establecementos físicos, polo que resulta un tanto rechamante que non sexa ata hoxe cando a compañía de Mountain View anunciou que os dispositivos Google Home por fin falan español (algo que xa fan dende hai máis de 2 semanas), o que atende directamente ao lanzamento dos altofalantes de Google en México.
Que desta volta Google estea a anunciar a estrea dun xeito aberto probablemente sexa consecuencia do malestar polo lanzamento español, considerado un rotundo fracaso, que as grandes cadeas de electrónica de consumo aseguraban que era consecuencia da falta de promoción por parte de Google.
Dende La Vanguardia aseguran que Media Markt fixo un encargo de 30.000 dispositivos de Google, dos que só terían vendido uns 600 na estrea, cando prevían vender uns 3.000 na primeira semana. Ante estes resultados culpan directamente á falta de publicidade nas liñas tradicionais de prensa ou televisión, de xeito que os produtos son pouco coñecidos para o público xeral.
Noutros mercados este tipo de produtos tamén tiveron un inicio pausado, aínda que agora que poden considerarse produtos maduros sorprende que non fosen mellor recibidos, aínda que o feito de que chegase a España antes Google que Amazon probablemente non facilitou a promoción destes dispositivos. De cumprirse os rumores, nun par de semanas teremos os altofalantes Amazon Echo á venda, e iso suporá o inicio da competencia neste tipo de trebellos, o que poderían impulsar as vendas grazas principalmente á súa maior exposición e ás posibles promocións e rebaixas.